ಯುವನಟಿ ಚೈತ್ರಾ ಕೋಟೂರು ಎಲ್ಲೇ ಹೋದರೂ ಸುದ್ದಿಯಾಗುತ್ತಿದ್ದಾರೆ. ಅದಕ್ಕೆ ಅವರ ನಟನೆಯ ಪ್ರಥಮ ಚಿತ್ರ ‘ಸೂಜಿದಾರ’ದಿಂದ ಇತ್ತೀಚಿನ ಬಿಗ್ ಬಾಸ್ ರಿಯಾಲಿಟಿ ಶೋ ತನಕ ಕಣ್ಣೆದುರಿನ ಉದಾಹರಣೆಗಳಿವೆ. ಈಗ ಅದಕ್ಕೆ ಮತ್ತೊಂದು ಹೊಸ ಸೇರ್ಪಡೆಯಾಗಿರುವುದು ‘ಒಂದು ದಿನ ಒಂದು ಕ್ಷಣ’ ಚಿತ್ರದಲ್ಲಿನ ಅವರ ಪಾತ್ರ.
ಸದ್ದಿಲ್ಲದೆ ಮೊದಲ ಶೆಡ್ಯೂಲ್ ಶೂಟಿಂಗ್ ಶುರು ಮಾಡಿದ್ದಂಥ ಚಿತ್ರ ‘ಒಂದು ದಿನ ಒಂದು ಕ್ಷಣ’. ಇದೀಗ ಚಿತ್ರತಂಡದೊಳಗೆ ಚೈತ್ರಾ ಕೋಟೂರು ಅವರ ಪ್ರವೇಶವಾಗುವುದರೊಂದಿಗೆ ಸೆಟ್ ಹೊಸ ಕಳೆ ಪಡೆದುಕೊಂಡಿದೆ. ಚಿತ್ರದ ಪ್ರಮುಖ ತಾರಾಗಣದಲ್ಲಿ ದಿಶಾ ಪೂವಯ್ಯ, ಶಶಿ ಶೇಖರ್ , ನಿಖಿತಾಸ್ವಾಮಿ, ಮದನ್ ಮಂಡ್ಯ ಮೊದಲಾದವರು ಅಭಿನಯಿಸಿದ್ದಾರೆ. ಮಹಿಳೆಯರ ಹಕ್ಕುಗಳ ಹೋರಾಟದ ಕುರಿತಾದ ಚಿತ್ರ ಇದಾಗಿದ್ದು, ಚೈತ್ರಾ ಕೋಟೂರು ಜಿಲ್ಲಾಧಿಕಾರಿಯಾಗಿ ಕಾಣಿಸಿಕೊಳ್ಳಲಿದ್ದಾರಂತೆ. ನಿಜ ಜೀವಿ ಕೂಡ ಸಾಮಾಜಿಕ ಹೋರಾಟಗಳಲ್ಲಿ ಭಾಗಿಯಾಗುವ ಜೀವಪರ ವ್ಯಕ್ತಿತ್ವ ಹೊಂದಿರುವ ಚೈತ್ರಾ ಕೋಟೂರು ಪಾತ್ರವನ್ನು ಹೇಗೆ ನಿಭಾಯಿಸಿದ್ದಾರೆ ಎನ್ನುವುದು ಸದ್ಯದಲ್ಲೇ ನಾವು ತೆರೆಯ ಮೇಲೆ ನೋಡಬಹುದಾಗಿದೆ. ಪ್ರಸ್ತುತ ಮಂಡ್ಯದಲ್ಲಿ ಚಿತ್ರೀಕರಣ ನಡೆಯುತ್ತಿದ್ದು, ಅಲ್ಲಿ ಚೈತ್ರಾ ಕೋಟೂರು ಪಾಲ್ಗೊಂಡಿರುವ ದೃಶ್ಯಗಳನ್ನು ತೆಗೆಯಲಾಗುತ್ತಿದೆ.
ನವ ನಿರ್ದೇಶಕ ಆಲ್ವಿನ್ ಆ್ಯಕ್ಷನ್ ಕಟ್ ಹೇಳುತ್ತಿರುವ ಈ ಚಿತ್ರಕ್ಕೆ ‘ಝಾನ್ಸಿ’, ‘ಜಲ್ಲಿಕಟ್ಟು’ ಚಿತ್ರಗಳಿಗೆ ಛಾಯಾಗ್ರಾಹಕರಾಗಿದ್ದ ವೀರೇಶ್ ಕ್ಯಾಮೆರಾಮ್ಯಾನ್ ಆಗಿದ್ದಾರೆ. ‘ನಮ್ಮ ಸೂಪರ್ ಸ್ಟಾರ್ಸ್’ ಪತ್ರಿಕೆಯ ಮೂಲಕ ಗಾಂಧಿನಗರದಲ್ಲಿ ಜನಪ್ರಿಯರಾಗಿರುವ ಅಫ್ಜಲ್ ಚಿತ್ರದ ನಿರ್ಮಾಣದ ಹೊಣೆ ಹೊತ್ತಿದ್ದಾರೆ.
