ಹದಿನೆಂಟು ಗಂಟೆಗಳ ಕಾಲ ನಿದ್ದೆ ಮಾಡುವ ‘ಜಂಟಲ್ ಮ್ಯಾನ್’ ಬಗ್ಗೆ ನೀವು ಈಗಾಗಲೇ ಕೇಳಿರುತ್ತೀರಿ. ಹೌದು; ಅದುವೇ ಪ್ರಜ್ವಲ್ ದೇವರಾಜ್ ಅವರು ನಾಯಕರಾಗಿರುವ ಚಿತ್ರ. ಚಿತ್ರದ ಆಡಿಯೋ ಸಿಡಿಯನ್ನು ಚಾಲೆಂಜಿಂಗ್ ಸ್ಟಾರ್ ಬಿಡುಗಡೆಗೊಳಿಸಿದ್ದಾರೆ.
ಚಿತ್ರ ನೋಡಲು ಮನವಿ ಮಾಡಿದ ದರ್ಶನ್
ಜಂಟಲ್ ಮ್ಯಾನ್ ಚಿತ್ರದ ಟ್ರೇಲರ್ ವೀಕ್ಷಿಸಿ ಪ್ರೋತ್ಸಾಹಿಸಿದ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಆಡಿಯೋ ಸಿಡಿಯನ್ನು ಬಿಡುಗಡೆಗೊಳಿಸಿ ಶುಭ ಕೋರಿದರು. ಪ್ರಜ್ವಲ್ ರಂಥ ಹಾರ್ಡ್ ವರ್ಕರ್, ಸಂಚಾರಿ ವಿಜಯ್ ಅವರಂಥ ಪ್ರತಿಭಾವಂತರ ಸಮಾಗಮದಲ್ಲಿ ಚಿತ್ರ ಚೆನ್ನಾಗಿ ಮೂಡಿರುವ ಭರವಸೆ ಎಲ್ಲರಿಗೂ ಇದೆ. ಎಲ್ಲರೂ ಚಿತ್ರ ನೋಡಿ ಪ್ರೋತ್ಸಾಹಿಸಿ ಎಂದು ದರ್ಶನ್ ಈ ಸಂದರ್ಭದಲ್ಲಿ ಹೇಳಿದರು. ಚಿತ್ರಕ್ಕೆ ಅಜನೀಶ್ ಲೋಕನಾಥ್ ಸಂಗೀತ ನೀಡಿದ್ದು ವಸಿಷ್ಠ ಸಿಂಹ ಹಾಡಿರುವ ಒಂದು ಗೀತೆಯ ಜತೆಗೆ ಜಯಂತ ಕಾಯ್ಕಿಣಿ ರಚನೆಯ ಮತ್ತೊಂದು ಗೀತೆಯ ಪ್ರದರ್ಶನವನ್ನು ಏರ್ಪಡಿಸಲಾಯಿತು.
ನಿಶ್ವಿಕಾಗೆ ಭವಿಷ್ಯ ಹೇಳಿದ್ದ ದೇವರಾಜ್!
ಚಿತ್ರಕ್ಕಾಗಿ ನಿರಂತರ 28 ಗಂಟೆಗಳ ಕಾಲ ಕೆಲಸ ಮಾಡಿದ್ದಕ್ಕಾಗಿ ಪ್ರಜ್ವಲ್ ಗೆ ಬೈದಿದ್ದಾಗಿ ಅವರ ತಂದೆ ದೇವರಾಜ್ ಹೇಳಿದರು. ಆದರೆ ತಂದೆಯ ಕಾಳಜಿಯ ಬೈಗುಳವೇ ತಮಗೆ ಚಿತ್ರದಲ್ಲಿ ಮತ್ತಷ್ಟು ತೊಡಗಿಸಿಕೊಳ್ಳಲು ಪ್ರೋತ್ಸಾಹ ತಂದುಕೊಟ್ಟಿತು ಎಂದು ಪ್ರಜ್ವಲ್ ಹೇಳಿದರು. ನಾಯಕಿ ನಿಶ್ವಿಕಾ ನಾಯ್ಡು ಮಾತನಾಡಿ “ಎಸ್ ಎಸ್ ಎಲ್ ಸಿಯಲ್ಲಿದ್ದಾಗ ನಾನು ರಿಯಾಲಿಟಿ ಶೋ ಒಂದರಲ್ಲಿ ಪಾಲ್ಗೊಂಡಿದ್ದೆ. ಆಗ ಅದರ ಜಡ್ಜ್ ಆಗಿ ಬಂದಿದ್ದ ದೇವರಾಜ್ ಸರ್, ಮುಂದೆ ನೀನು ನಾಯಕಿಯಾಗುತ್ತೀಯ ಎಂದಿದ್ದರು. ಅದೇ ರೀತಿ ಇಂದು ಅವರ ಮಗನ ಚಿತ್ರದಲ್ಲೇ ನಾಯಕಿಯಾಗಿದ್ದೇನೆ” ಎಂದು ಖುಷಿ ಹಂಚಿಕೊಂಡರು. ಚಿತ್ರದಲ್ಲಿ ವೈದ್ಯರ ಪಾತ್ರದಲ್ಲಿ ನಟಿಸಿರುವ ಅರವಿಂದ್ ರಾವ್, ನಿರ್ದೇಶಕ ಜಡೇಶ್ ಕುಮಾರ್ ಉಪಸ್ಥಿತರಿದ್ದರು.
ಇದು ರಿಮೇಕ್ ಚಿತ್ರವಲ್ಲ..!
ಇದು ವಿಶಾಲ್ ಅಭಿನಯಿಸಿದ ತಮಿಳಯ ಚಿತ್ರದ ರಿಮೇಕ್ ಎನ್ನುವ ಸುದ್ದಿ ಹರಡಿದೆ. ಆದರೆ ಖಂಡಿತವಾಗಿ ಇದು ಅದರ ರಿಮೇಕ್ ಅಲ್ಲ. ನಿಜ ಹೇಳಬೇಕೆಂದರೆ ನಮ್ಮ ಟ್ರೇಲರ್ ನೋಡಿಯೇ ತಮಿಳು, ಮಲಯಾಳಂ ಭಾಷೆಗಳಿಂದ ರಿಮೇಕ್ ಗಾಗಿ ಬೇಡಿಕೆಗಳು ಬರುತ್ತಿವೆ. ನಾನು ರಿಮೇಕ್ ನಿರ್ದೇಶಿಸಿರಬಹುದು; ಆದರೆ ಇದು ನನ್ನ ನಿರ್ಮಾಣದ ಜಡೇಶ್ ಕುಮಾರ್ ನಿರ್ದೇಶನದ ಒರಿಜಿನಲ್ ಚಿತ್ರ” ಎಂದರು.
ಮಸ್ತ್ ಸಂಭಾಷಣೆ ಬರೆದಿರುವ ಮಾಸ್ತಿ
ಸಂಭಾಷಣೆಕಾರ ಮಾಸ್ತಿ ತಾವು ಚಿತ್ರದ ಕತೆಯ ಆರಂಭದಿಂದಲೂ ಜತೆಗೆ ಚರ್ಚೆಯಲ್ಲಿ ಭಾಗಿಯಾಗಿದ್ದೆ. ನನ್ನ ಜತೆಗೆ ಇನ್ನೊಬ್ಬರು ಕೂಡ ಚಿತ್ರಕ್ಕೆ ಸಂಭಾಷಣೆ ರಚಿಸಿರುವುದಾಗಿ ತಿಳಿಸಿದರು. ಚಿತ್ರ ಈ ವಾರ ಅಂದರೆ ಫೆಬ್ರವರಿ 7ರಂದು ಚಿತ್ರ ರಾಜ್ಯಾದ್ಯಂತ ತೆರೆಗೆ ಬರಲಿದೆ.
