“ಪ್ರೇಕ್ಷಕರ ಒತ್ತಾಯದ ಮೇರೆಗೆ ತಯಾರಾದ ಚಿತ್ರ ‘ಮತ್ತೆ ಉದ್ಭವ’ ಯಾಕೆಂದರೆ ಮೂವತ್ತು ವರ್ಷಗಳಿಂದ ಜನರು ನಾನು ಹೋದಲ್ಲಿ ಬಂದಲ್ಲಿ ‘ಅದರ ಎರಡನೇ ಭಾಗ ಯಾವಾಗ ಮಾಡ್ತೀರ?’ ಅಂತ ಕೇಳ್ತಾನೇ ಇದ್ದರು. ಈಗ ಅಂಥದೊಂದು ಚಿತ್ರ ಮಾಡಿದ್ದೇನೆ. ಜನ ಬಂದು ನೋಡಬೇಕಷ್ಟೇ ಎಂದು ಕೋಡ್ಲು ರಾಮಕೃಷ್ಣ ಅವರು ‘ಮತ್ತೆ ಉದ್ಭವ’ ಚಿತ್ರದ ಬಿಡುಗಡೆಪೂರ್ವ ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡುತ್ತಿದ್ದರು.
ಚಿತ್ರ ಎಲ್ಲ ರೀತಿಯ ಪ್ರೇಕ್ಷಕರಿಗೂ ಇಷ್ಟವಾಗುತ್ತದೆ. ವಿ. ಮನೋಹರ್ ಅವರ ಹಿನ್ನೆಲೆ ಸಂಗೀತವೇ ಚಿತ್ರದ ಜೀವಾಳ. ‘ಗೀತಾ ಬ್ಯಾಂಗಲ್ ಸ್ಟೋರ್’ ಮತ್ತು ‘ಪ್ರೀಮಿಯರ್ ಪದ್ಮಿನಿ’ ಚಿತ್ರಗಳನ್ನು ನೋಡಿ ನಾಯಕನ ಪಾತ್ರಕ್ಕೆ ಪ್ರಮೋದ್ ಅವರನ್ನು ಆಯ್ದುಕೊಂಡೆವು. ಇನ್ನು ನಾಯಕಿಯಾಗಿ ನಟಿಸಿರುವ ಮಿಲನಾ ನಾಗರಾಜ್ ಅವರು ಕಳೆದ ವಾರವಷ್ಟೇ ಬಿಡುಗಡೆಗೊಂಡಂಥ ಚಿತ್ರದ ನಟನೆಗಾಗಿ ವಿಮರ್ಶಕರ ಪ್ರಶಂಸೆಗೆ ಪಾತ್ರವಾಗಿರುವ ನಟಿ. ಉಳಿದಂತೆ ಚಿತ್ರ ಎಲ್ಲರನ್ನು ನೋಡಿಸಿಕೊಂಡು ಹೋಗುವ ಅಂಶಗಳನ್ನು ಹೊಂದಿರುವ ಕಾರಣ ಪ್ರೇಕ್ಷಕರಿಗೆ ಇಷ್ಟವಾಗುವ ನಂಬಿಕೆ ದಟ್ಟವಾಗಿದೆ ಎಂದು ಕೋಡ್ಲು ರಾಮಕೃಷ್ಣ ಹೇಳಿದರು.
ರಾಮಕೃಷ್ಣ ಸರ್ ಅವರ ಫೋನ್ ಬಂದಾಗ ಹಾಸ್ಯ ಪಾತ್ರವೇನೋ ಎನ್ನುವ ಕಾರಣಕ್ಕೆ ನಿರಾಕರಿಸಬೇಕು ಎಂದುಕೊಂಡಿದ್ದೆ. ಆದರೆ ಕತೆಯಲ್ಲಿನ ಟ್ವಿಸ್ಟ್ ನೋಡಿ ಒಪ್ಪಿಕೊಂಡೆ. ಒಂದುವೇಳೆ ನಾನು ಕಾಮಿಡಿ ಎನ್ನುವ ಕಾರಣಕ್ಕೆ ಮಾಡದೇ ಹೋಗಿದ್ದರೆ ಒಳ್ಳೆಯ ಚಿತ್ರ ಮಿಸ್ ಆಗುತ್ತಿತ್ತು. ಯಾಕೆಂದರೆ ಹಾಸ್ಯ ಮಾತ್ರವಲ್ಲ, ಎಲ್ಲ ಶೇಡ್ ಗಳಿರುವ ಪಾತ್ರ ಸಿಕ್ಕಿದೆ” ಎಂದು ಸಂತೃಪ್ತಿ ವ್ಯಕ್ತಪಡಿಸಿದರು ನಾಯಕ ಪ್ರಮೋದ್. ಥ್ರಿಲ್ಲರ್ ಮಂಜು ಅವರ ಆ್ಯಕ್ಷನ್ ದೃಶ್ಯಗಳಿವೆ. ‘ಬಿಲೀವ್ ಇನ್ ಗಾಡ್ ಬಟ್ ಡೋಂಟ್ ಡಿಪೆಂಡ್ ಇನ್ ಗಾಡ್’ ಎನ್ನುವುದು ಚಿತ್ರದ ಸಂದೇಶ’ ಎಂದು ಅವರು ಹೇಳಿದರು.
ನಾಯಕಿ ಮಿಲನಾ ನಾಗರಾಜ್ ಮಾತನಾಡಿ, ‘ಚಿತ್ರದಲ್ಲಿ ಸಿನಿಮಾ ನಟಿ ಮತ್ತು ರಾಜಕಾರಣಿಯ ಪಾತ್ರ ಮಾಡಿದ್ದೇನೆ’ ಎಂದರು. ನಿರ್ಮಾಪಕ ನಿತ್ಯಾನಂದ ಭಟ್, ಸಹ ನಿರ್ಮಾಪಕ ಗುರುಪ್ರಸಾದ್ ಮುದ್ರಾಡಿ ಮೊದಲಾದವರು ಉಪಸ್ಥಿತರಿದ್ದರು.
ಸಿನಿಮಾ ಇದೇ ಶುಕ್ರವಾರ ರಾಜ್ಯದ್ಯಂತ 160ಕ್ಕೂ ಅಧಿಕ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.
