ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಪ್ರಾಣಿ ಪ್ರೀತಿ ಇಂದು ರಾಜ್ಯದ ಗುರುತಾಗಿದೆ. ಅದಕ್ಕೆ ಕಾರಣ ಅವರು ಅರಣ್ಯ ಇಲಾಖೆಯ ರಾಯಭಾರಿಯಾಗಿ ಗುರುತಿಸಿಕೊಂಡಿರುವುದು. ಇದೀಗ ದರ್ಶನ್ ಅವರಿಗೆ ಜನ್ಮದಿನದ ಶುಭಾಶಯ ತಿಳಿಸಿರುವ ಅರಣ್ಯ ಇಲಾಖೆ ದರ್ಶನ್ ಬ್ರಾಂಡ್ ಅಂಬಾಸಿಡರ್ ಆಗಿರುವುದು ತಮಗೆ ಖುಷಿ ತಂದಿರುವುದಾಗಿ ತಿಳಿಸಿದ್ದಾರೆ.
ದರ್ಶನ್ ಅವರ ಕೈ ಸೇರಿರುವ ಈ ಪತ್ರದಲ್ಲಿ ದರ್ಶನ್ ಅವರಿಗೆ ಜನ್ಮದಿನದ ಶುಭಾಶಯಗಳನ್ನು ಕೋರಿರುವುದರ ಜತೆಯಲ್ಲಿ, ತಾವು ರಾಯಭಾರಿಯಾಗಿರುವುದರಿಂದಾಗಿ ಅರಣ್ಯ ರಕ್ಷಣೆಗೆ ಸಾರ್ವಜನಿಕರಿಂದ ತುಂಬ ಸಹಕಾರ ಸಿಗುತ್ತಿದೆ ಎಂದು ತಿಳಿಸಿದ್ದಾರೆ. “ನೀವು ಒಂದು ಮಹಾನ್ ಸ್ಫೂರ್ತಿಯಾಗಿದ್ದು, ನಿಮ್ಮ ಸಹಭಾಗಿತ್ವ ಪಡೆದಿರುವುದಕ್ಕೆ ನಾವು ಧನ್ಯರಾಗಿದ್ದೇವೆ. ಮಾತ್ರವಲ್ಲ, ಮುಂದೆಯೂ ನೀವು ರಾಯಭಾರಿಯಾಗಿ ಮುಂದುವರಿಯುವುದು ನಮಗೆ ಗೌರವವೆಂದು ಭಾವಿಸಿ ಕೃತಜ್ಞರಾಗಿದ್ದೇವೆ” ಎನ್ನುವುದು ಪತ್ರದ ಸಾರವಾಗಿದೆ.
ದರ್ಶನ್ ಅವರು ಪ್ರಾಣಿಪ್ರಿಯರೆನ್ನುವುದು ಎಲ್ಲರಿಗೂ ಗೊತ್ತು. ಆ ಪ್ರೀತಿಯೇ ಅವರನ್ನು ವನ್ಯಜೀವಿ ಛಾಯಾಗ್ರಾಹಕರನ್ನಾಗಿ ಮಾಡಿದೆ. ಹಾಗೆ ಅವರು ಕ್ಲಿಕ್ಕಿಸಿದ ಫೊಟೋಗಳನ್ನು ಮೈಸೂರಿನಲ್ಲಿ ಪ್ರದರ್ಶನ ಮತ್ತು ಮಾರಾಟ ನಡೆಸಿ ಅದರ ಲಾಭವನ್ನು ಅರಣ್ಯ ಇಲಾಖೆಗೆ ನೀಡುವುದರೊಂದಿಗೆ ಈ ಬಾಂಧವ್ಯ ಉತ್ತಮವಾಗಿತ್ತು. ಇತ್ತೀಚೆಗಷ್ಟೇ ದಿಢೀರನೆ ಸ್ನೇಹಿತರ ಜತೆಗೆ ಉತ್ತರಾಖಂಡದ ಅರಣ್ಯಕ್ಕೂ ಭೇಟಿ‌ನೀಡಿ ಫೊಟೋ ಶೂಟ್ ನಡೆಸಿದ್ದನ್ನು ಇಲ್ಲಿ ಸ್ಮರಿಸಬಹುದು.
