ನಮ್ ಟಾಕೀಸ್ ವೆಬ್ಸೈಟ್ ಖ್ಯಾತಿಯ ಭರತ್ ಸಾರಥ್ಯದಲ್ಲಿ ಕಳೆದ ಐದು ವರ್ಷಗಳಿಂದ ನಡೆಯುತ್ತಿರುವ ಕ್ರಿಕೆಟ್ ಮ್ಯಾಚ್ ಸ್ಪರ್ಧೆಯು ಈ ಬಾರಿ ಗಣರಾಜ್ಯೋತ್ಸವದ ದಿನ ನೆರವೇರಲಿದೆ.
ಐದು ವರ್ಷಗಳಿಂದ ಸತತವಾಗಿ ನಡೆಯುತ್ತಿರುವ ಈ ಸ್ಪರ್ಧೆಯನ್ನು ಕಳೆದ ವರ್ಷ ಕೋವಿಡ್ ಕಾರಣದಿಂದ ನೆರವೇರಿಸಲು ಸಾಧ್ಯವಾಗಿಲ್ಲ. ಹಾಗಾಗಿಯೇ ಈ ಬಾರಿ ವರ್ಷಾರಂಭದಲ್ಲೇ ಸ್ಪರ್ಧೆ ನಡೆಸುತ್ತಿರುವುದಾಗಿ ಸಿನಿಕನ್ನಡದ ಜೊತೆಗೆ ಮಾತನಾಡಿದ ಭರತ್ ತಿಳಿಸಿದ್ದಾರೆ.
ನವರಸ ನಾಯಕ ಜಗ್ಗೇಶ್ ಅವರ ಪ್ರೋತ್ಸಾಹದೊಂದಿಗೆ
ನಮ್ ಟಾಕೀಸ್.ಇನ್ ಅರ್ಪಿಸುವ ‘ಫ್ಯಾನ್ಸ್ ಕ್ರಿಕೆಟ್ ಲೀಗ್’ ಸೀಸನ್ 6 ಜನವರಿ 26ರಂದು ಗೊರಗುಂಟೆ ಪಾಳ್ಯ ರಾಜಣ್ಣ ಕ್ರೀಡಾಂಗಣದಲ್ಲಿ ಆಯೋಜಿಸಲಾಗಿದೆ. ಆರು ತಂಡಗಳ ಲೀಗ್ ಮ್ಯಾಚ್ ನಲ್ಲಿ ಎಲ್ಲವೂ ಸಿನಿಮಾ ತಾರೆಯರ ಅಭಿಮಾನಿ ತಂಡಗಳೇ ಇರುವುದು ವಿಶೇಷ. ಸ್ಟಾರ್ಸ್ ಅಭಿಮಾನಿಗಳು ಪರಸ್ಪರ ಕಾದಾಟ ನಡೆಸಬಾರದು ಎನ್ನುವ ಕಾರಣಕ್ಕಾಗಿ ಮತ್ತು ಅವರೊಳಗಿನ ಸೌಹಾರ್ದತೆಯನ್ನು ಮೆರೆಸುವ ಸಲುವಾಗಿಯೇ ಈ ಸ್ಪರ್ಧೆ ಶುರು ಮಾಡಿದ್ದಾಗಿ ಭರತ್ ಹೇಳುತ್ತಾರೆ. ಅದಕ್ಕೆ ಪೂರಕವಾಗಿ ಇಷ್ಟು ವರ್ಷಗಳ ವರೆಗೆ ಕೂಡ ಸ್ಪರ್ಧೆ ಚೆನ್ನಾಗಿಯೇ ನಡೆದುಕೊಂಡು ಬಂದಿದೆ. ಈ ಬಾರಿ ಕೂಡ ಇನ್ನಷ್ಟು ಸೊಗಸಾಗಿ ಮೂಡಿ ಬರುವುದಾಗಿ ನಿರೀಕ್ಷಿಸಲಾಗಿದೆ.
