ಉಪ್ಪಿಗಿಂತ ರುಚಿ ಬೇರೆ ಇಲ್ಲ ಅಂತಾರೆ. ಆದರೆ ಈ ಸಾಲ್ಟ್ ಅದಲ್ಲ! ಇದು ಹೊಸಬರ ತಂಡದ ಸಿನಿಮಾ. ಇತ್ತೀಚೆಗೆ ಮಲ್ಲೇಶ್ವರದಲ್ಲಿ ಏರ್ಪಡಿಸಲಾದ ವಶೇಷ ಪ್ರದರ್ಶನದಲ್ಲಿ ಚಿತ್ರವನ್ನು ವೀಕ್ಷಿಸಿದ ಚಂದನವನ ಸಂಗೀತ ಲೋಕದ ನಾದಬ್ರಹ್ಮ ಹಂಸಲೇಖಾ ಅವರು, “ಇದೊಂದು ಸಂಪೂರ್ಣ ಮನರಂಜನಾ ದಾಯಕ ಚಿತ್ರ. ಕಾಸು ಕೊಟ್ಟು ಚಿತ್ರ ಮಂದಿರಕ್ಕೆ ಕಾಲಿಡುವ ಪ್ರೇಕ್ಷಕನಿಗೆ ಖಂಡಿತವಾಗಿ ಹಣದ ಮೌಲ್ಯ ವಾಪಾಸು ಸಿಕ್ಕಷ್ಟು ಖುಷಿ ಮಾಡಿಕೊಡುತ್ತದೆ” ಎಂದಿದ್ದಾರೆ.
ಅಂದಹಾಗೆ ಹಂಸಲೇಖಾ ಅವರ ಶುಭ ಹಾರೈಕೆಯ ಮಾತುಗಳು ಚಿತ್ರತಂಡಕ್ಕೆ ಆನೆಬಲ ನೀಡಿದಂತೆ ಆಗಿದೆ. ಸತ್ಯ-ಅಕುಲ್-ಲೋಕಿ-ತ್ರಿನೇತ್ರ ಈ ನಾಲ್ಕು ಪಾತ್ರಗಳ ಮಿಶ್ರಣವು ಚಿತ್ರ ಕತೆಯನ್ನು ಒಂದೊಳ್ಳೆಯ ಪ್ರಯಾಣದಂತೆ ಕರೆದುಕೊಂಡು ಹೋಗುತ್ತದೆ. ಅಡುಗೆಗೆ ರುಚಿ ಎಷ್ಟು ಮುಖ್ಯವೋ, ಅದೇ ರೀತಿ ಸಿನಿಮಾವು ಮನಸ್ಸಿಗೆ ಮುದ ಕೊಡುತ್ತದೆಂದು ಸುದ್ದಿಗೋಷ್ಟಿಯಲ್ಲಿ ಎಲ್ಲರು ತಮ್ಮ ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದಾರೆ. ಇದೇ ಸಂದರ್ಭದಲ್ಲಿ ಟ್ರೈಲರ್ ಮತ್ತು ಮೂರು ಹಾಡುಗಳನ್ನು ತೋರಿಸಲಾಯಿತು.
ರಚನೆ, ನಿರ್ದೇಶನ ಮಾಡಿರುವ ಭರತ್‌ ನಂದ ಬಣ್ಣ ಹಚ್ಚಿದ್ದು ಅವರೊಂದಿಗೆ ಚೇತನ್‌ ಕುಮಾರ್, ಚಂದ್ರು ಛತ್ರಪತಿ, ಸತೀಶ್‌ ಮಳವಳ್ಳಿ ನಾಯಕರುಗಳು. ತಾರಾಗಣದಲ್ಲಿ ಬಲ ರಾಜವಾಡಿ, ಸಂದೀಪ್, ವಿಜಯಶ್ರೀ ಕಲಬುರ್ಗಿ, ಯಶಸ್ವಿನಿ ಶೆಟ್ಟಿ, ರಶ್ಮಿತಾ ಗೌಡ, ಚಕ್ರವರ್ತಿ ದಾವಣಗೆರೆ, ಹರ್ಷ ಮೊದಲಾದವರು ಬಣ್ಣ ಹಚ್ಚಿದ್ದಾರೆ. ರಾಘವೇಂದ್ರ ಕಾಮತ್ ಸಾಹಿತ್ಯದ ನಾಲ್ಕು ಹಾಡುಗಳಿಗೆ ಯಲಸ್ಟಿನ್-ಯದುನಂದನ್ ಜಂಟಿಯಾಗಿ ಸಂಗೀತ ಸಂಯೋಜಿಸಿದ್ದಾರೆ. ಛಾಯಾಗ್ರಹಣ ಸಂತೋಷ್‌ದಯಾಳನ್, ಸಂಕಲನ ವಿನಯ್‌ ಕುಮಾರ, ನೃತ್ಯ ಮಧುಸೂದನ್, ಸಂಭಾಷಣೆ ಸತೀಶ್‌ ಮಳವಳ್ಳಿ ಅವರದ್ದಾಗಿದೆ. ಬೆಂಗಳೂರು ಸುತ್ತಮುತ್ತ ಶೂಟಿಂಗ್ ನಡೆಸಲಾಗಿದೆ. ಶಾಲಿನಿ ಎಂ ಅವರು ರಾಜರತ್ನ ಸ್ಟುಡಿಯೋ ಮೂಲಕ ನಿರ್ಮಾಣ ಮಾಡಿರುವ ಚಿತ್ರವು ಸದ್ಯದಲ್ಲೆ ತೆರೆಗೆ ಬರಲಿದೆ.
