ರಿಯಾಲಿಟಿ ಶೋ ಮೂಲಕ ಜನಪ್ರಿಯತೆ ಪಡೆದಿದ್ದ ಬಾಲ ಪ್ರತಿಭೆ ಸಮನ್ವಿ ನಿಧನಗೊಂಡಿದ್ದಾಳೆ. ಬೆಂಗಳೂರಿನ ಕೋಣನಕುಂಟೆ ಸಮೀಪ ನಡೆದ ರಸ್ತೆ ಅಪಘಾತದಲ್ಲಿ ದುರಂತ ಸಂಭವಿಸಿದೆ. ತಾಯಿಯೊಂದಿಗೆ ಸ್ಕೂಟಿಯಲ್ಲಿ ಪಯಣಿಸುತ್ತಿದ್ದ ಸಮನ್ವಿ ಟಿಪ್ಪರ್ ಕೆಳಗೆ ಸಿಲುಕಿ ದಾರುಣ ಸಾವು ಕಂಡಿದ್ದಾಳೆ. ತಾಯಿ ಕಿರುತೆರೆ ನಟಿ ಅಮೃತಾ ಗಂಭೀರ ಗಾಯಗಳೊಂದಿಗೆ ಆಸ್ಪತ್ರೆಗೆ ದಾಖಲಾಗಿದ್ದಾರೆ.
ಕೋಣನ ಕುಂಟೆಯಲ್ಲಿ ತಾಯಿ ಮಗಳು ಸ್ಕೂಟಿಯಲ್ಲಿ ರಸ್ತೆ ದಾಟುವಾಗ ಟಿಪ್ಪರ್ ಡಿಕ್ಕಿಯಾಗಿದೆ. ಟಿಪ್ಪರ್ ಚಾಲಕನನ್ನು ಕುಮಾರಸ್ವಾಮಿ ಲೇಔಟ್ ಪೊಲೀಸರು ಬಂಧಿಸಿದ್ದಾರೆ. ಬಾಲಕಿಯ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ಕಿಮ್ಸ್ ಗೆ ರವಾನಿಸಲಾಗಿದೆ.
ಸಮನ್ವಿಗೆ ಕೇವಲ ಆರು ವರ್ಷಗಳಷ್ಟೇ ಆಗಿತ್ತು. ಇತ್ತೀಚೆಗೆ ಕಲರ್ಸ್ ವಾಹಿನಿಯ ಜನಪ್ರಿಯ ರಿಯಾಲಿಟಿ ಶೋ ‘ನಮ್ಮಮ್ಮ ಸೂಪರ್ ಸ್ಟಾರ್’ ಮೂಲಕ ಜನಮನಸೂರೆಗೊಂಡಿದ್ದ ಬಾಲ ಪ್ರತಿಭೆ ಆಕೆ. ತಾಯಿ ಅಮೃತಾ ಪ್ರಸ್ತುತ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗ್ತಿರೋ ‘ಸತ್ಯ’ ಧಾರಾವಾಹಿಯ ಪೋಷಕ ನಟಿ. ಅವರ ತಾತ ಗುರುರಾಜುಲು ನಾಯ್ಡು ನಾಡು ಕಂಡ ಹರಿಕಥಾ ದಿಗ್ಗಜ. ಇದೀಗ ನಡೆದಿರುವ ದುರಂತ ಘಟನೆ ಎಲ್ಲರ ಕಣ್ಣುಗಳನ್ನು ತೇವವಾಗಿಸಿದೆ.
ಗರ್ಭಿಣಿ ಆಗಿರುವ ಅಮೃತಾ ನಾಯ್ಡು
ಸಮನ್ವಿ ತಮ್ಮ ಎರಡನೇ ಮಗು. ಆದರೆ ಮೊದಲ ಮಗು ಏಳನೇ ತಿಂಗಳಲ್ಲೇ ತೀರಿಕೊಂಡದ್ದಾಗಿ ಅಮೃತಾ ನಾಯ್ಡು ರಿಯಾಲಿಟಿ ಶೋ ವೇದಿಕೆ ಮೇಲೆ ಹೇಳಿಕೊಂಡಿದ್ದರು. ಅಷ್ಟು ಕಾಳಜಿಯಿಂದ, ಮುದ್ದಿನಿಂದ ನೋಡಿಕೊಂಡಿದ್ದ ಮಗಳನ್ನು ಈಗ ಈ ತಾಯಿ ಕಳೆದುಕೊಂಡಿದ್ದಾರೆ.
ವಿಚಿತ್ರ ಏನೆಂದರೆ ಸತ್ಯ ಧಾರಾವಾಹಿಯಲ್ಲಿ ಅವರ ಪಾತ್ರಕ್ಕೆ ಇಂದೇ ಬದಲಿ ಪಾತ್ರಧಾರಿಯನ್ನು ಬಳಸಿಕೊಂಡು ಚಿತ್ರೀಕರಿಸಲಾಗಿದೆ. ಅದಕ್ಕೆ ಅಮೃತಾ ನಾಯ್ಡು ಅವರು ಗರ್ಭವತಿಯಾಗಿದ್ದೇ ಕಾರಣ ಎಂದು ಬಲ್ಲಮೂಲಗಳಿಂದ ಸಿಕ್ಕ ಮಾಹಿತಿ. ಇದೀಗ ಅಮೃತಾ ಗೌಡ ಗಂಭೀರ ಗಾಯಗಳೊಂದಿಗೆ ಐಸಿಯುನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಪ್ರಜ್ಞೆ ಬಂದ ಮೇಲೆ ಈ ಎಲ್ಲ ಆಘಾತಗಳನ್ನು ಸಹಿಸುವ ಶಕ್ತಿ ಆಕೆಗೆ ಬರಬೇಕಿದೆ.
