ಜನುಮದ ಜೋಡಿ, ದುನಿಯಾದಂಥ ಚಿತ್ರಗಳ ಮೂಲಕ ಜನ್ಮ ಪೂರ್ತಿ ಕೇಳುವಂಥ ಹಾಡುಗಳನ್ನು ನೀಡಿದವರು ವಿ ಮನೋಹರ್. ಪ್ರಶಸ್ತಿ, ಪ್ರಸಿದ್ಧಿ ಎಲ್ಲವನ್ನೂ ಪಡೆದಿರುವ ಈ ಸಂಗೀತ ನಿರ್ದೇಶಕರು ಈಗ ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ಇದಕ್ಕೆ ಕಾರಣವಾಗಿದ್ದು ಇವರು ಹೊಸದಾಗಿ ಒಪ್ಪಿಕೊಂಡಿರುವ ‘ಭಾವಪೂರ್ಣ’ ಚಿತ್ರ.
‘ಮದಿಪು’ ಎನ್ನುವ ಚಿತ್ರ ನಿರ್ದೇಶಿಸಿ ರಾಷ್ಟ್ರ ಪ್ರಶಸ್ತಿ ಪಡೆದವರು ಚೇತನ್ ಮುಂಡಾಡಿ. ಆ ಚಿತ್ರಕ್ಕೂ ಸಂಗೀತ ನಿರ್ದೇಶಕ ವಿ ಮನೋಹರ್. ಇದೀಗ ಇದೇ ಚೇತನ್ ಮುಂಡಾಡಿ ಭಾವಪೂರ್ಣ ಎನ್ನುವ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ವಿ ಮನೋಹರ್ ಅವರು ಚಿತ್ರಕ್ಕಾಗಿ ನೀಡುತ್ತಿರುವ ಟ್ಯೂನ್ಗಳು ನಿರ್ದೇಶಕರಿಗೆ ಒಪ್ಪಿಗೆಯಾಗುತ್ತಿಲ್ಲ ಹೀಗಾಗಿ ತುಂಬಾನೇ ತಲೆಕೆಡಿಸಿಕೊಂಡಿದ್ದಾರೆ. ಹಾಗಂತ ವಿಡಿಯೋ ಒಂದು ವೈರಲ್ ಆಗಿದೆ.
ಈ ವಿಡಿಯೋದಲ್ಲಿ ತಮಗೆ ಆಗಿರುವ ಕಷ್ಟವನ್ನು ಮನೋಹರ್ ಅವರು ಖ್ಯಾತ ನಟಿ ಇಳಾ ವಿಟ್ಲಾ ಅವರೊಂದಿಗೆ ಹಂಚಿಕೊಳ್ಳುತ್ತಿರುವ ದೃಶ್ಯ ಇದೆ. ಪೂರ್ತಿ ವಿಡಿಯೋ ನೋಡಿದವರಿಗೆ ಇದು ಕೂಡ ಪ್ರಮೋಶನ್ನ ಒಂದು ಭಾಗ ಎಂದು ಅರ್ಥವಾಗಬಹುದು. ರಮೇಶ್ ಪಂಡಿತ್ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಭಾವಪೂರ್ಣ ಚಿತ್ರದ ಟ್ರೇಲರ್ ಬಿಡುಗಡೆ ಸದ್ಯದಲ್ಲೇ ನೆರವೇರಲಿದೆ. ಟ್ರೇಲರ್ಗೂ ಮೊದಲೇ ಚಿತ್ರದ ಬಗ್ಗೆ ಈ ರೀತಿ ಗಮನ ಸೆಳೆಯುವ ವಿಡಿಯೋ ಮಾಡಲಾಗಿದೆ.
ಭಾವಪೂರ್ಣ ತೊಂಬತ್ತರ ದಶಕದಲ್ಲಿ ನಡೆಯುವ ಕತೆಯನ್ನು ಹೊಂದಿದೆ. ಕಾಂತಾರ ಬರುವುದಕ್ಕೂ ವರ್ಷಗಳ ಮೊದಲೇ ಭೂತಾರಾಧನೆಯ ಕತೆಯನ್ನು ಚಿತ್ರ ಮಾಡಿ, ರಾಷ್ಟ್ರ ಪ್ರಶಸ್ತಿ ಪಡೆದ ಪ್ರತಿಭಾವಂತ ಚೇತನ್. ಹೀಗಾಗಿ ಭಾವಪೂರ್ಣ ಚಿತ್ರದ ಬಗ್ಗೆಯೂ ವಿಶೇಷ ನಿರೀಕ್ಷೆಗಳಿವೆ. ಪ್ರಸನ್ನ ಛಾಯಾಗ್ರಹಣ, ಕೀರ್ತಿ ಸಂಕಲನ ಇರುವ ಈ ಸಿನಿಮಾಕ್ಕೆ ಸುಂದರ್ ವೀಣಾ ಸಂಭಾಷಣೆ ಬರೆದಿದ್ದಾರೆ. ಪ್ರಶಾಂತ್ ಅಂಜನಪ್ಪ ಚಿತ್ರ ನಿರ್ಮಿಸಿದ್ದಾರೆ.
