ಶೀರ್ಷಿಕೆಯಿಂದಲೇ ಕುತೂಹಲ ಮೂಡಿಸಿರುವ ‘ಡೆಮೋಪೀಸ್’ ಚಿತ್ರ ಪ್ರೇಮಿಗಳ ದಿನಾಚರಣೆಯಂದು ತೆರೆಕಾಣಲಿದೆ. ಚಿತ್ರದ ಬಿಡುಗಡೆ ಪೂರ್ವ ಮಾಧ್ಯಮಗೋಷ್ಠಿಯಲ್ಲಿ ಚಿತ್ರತಂಡ ಹಂಚಿಕೊಂಡ ಸಮಗ್ರ ಮಾಹಿತಿಗಳು ಇಲ್ಲಿವೆ.
ಚಿತ್ರದ ನಿರ್ದೇಶಕ ವಿವೇಕ್ ಮಾತನಾಡಿ, “ಇದು ನನ್ನ ಮೊದಲ ನಿರ್ದೇಶನದ ಚಿತ್ರ. ಚಿತ್ರದಲ್ಲಿ ಕೂಡ ಆತನ ಬದುಕಿನಲ್ಲಿ ಒಂದು ಎಕ್ಸ್ ಪೀರಿಯನ್ಸ್ ಮಾಡಲಾಗುತ್ತದೆ. ಸಾಮಾನ್ಯವಾಗಿ ಎಕ್ಸ್ಪೀರಿಯನ್ಸ್ ಗೆ ಬಳಸಲಾಗುವ ವಸ್ತುವನ್ನು ‘ಡೆಮೋ ಪೀಸ್’ ಅಂತಾರೆ. ಅಂಥದೇ ಒಂದು ಘಟನೆ ನಾಯಕನ ಬಾಳಲ್ಲಿಯೂ ನಡೆಯುತ್ತದೆ” ಎಂದರು.
ಭರತ್ ಬೋಪಣ್ಣ ನಾಯಕ
ಚಿತ್ರದ ನಾಯಕ ಭರತ್ ಬೋಪಣ್ಣ ‘ಬ್ರಹ್ಮಗಂಟು’ ಧಾರಾವಾಹಿಯ ಮೂಲಕ ಕಿರುತೆರೆಯಲ್ಲಿ ಗುರುತಿಸಿಕೊಂಡವರು. ಚಿತ್ರದಲ್ಲಿ ಹರ್ಷ ಎನ್ನುವ ಕಾಲೆಜ್ ಹುಡುಗನಾಗಿ ಶೋಕಿ ಮಾಡುವ ಪಾತ್ರ. ರೇಖಾ ಅವರೊಂದಿಗೆ ನಟಿಸಿದ್ದು ಖುಷಿಯಾಯಿತು.
ಸೊನಾಲ್ ನಾಯಕಿ
‘ಪಂಚತಂತ್ರ’ ಖ್ಯಾತಿಯ ನಾಯಕಿ, ಮಂಗಳೂರು ಬೆಡಗಿ ಸೊನಾಲ್ ಮೊಂಟೆರೊ ಚಿತ್ರದಲ್ಲಿ ನಾಯಕಿಯಾಗಿದ್ದು, ಚಿತ್ರದಲ್ಲಿ ತಮಗೆ ಹೆಚ್ಚು ದೃಶ್ಯಗಳಿಲ್ಲ. ಆದರೆ ಇರುವ ಅವಕಾಶದಲ್ಲಿ ನೆನಪು ಉಳಿಯುವಂಥ ಪಾತ್ರ ದೊರಕಿದೆ” ಎಂದು ಸಂತೃಪ್ತಿ ವ್ಯಕ್ತಪಡಿಸಿದರು. ಮಾತ್ರವಲ್ಲ, ಕತೆ ಕೇಳದೇನೇ ನಟನೆ ಮಾಡಲು ಒಪ್ಪಿಕೊಂಡಿದ್ದೆ. ಯಾಕೆಂದರೆ ರೇಖಾ ಅವರು ಫೋನ್ ಮಾಡಿ ನಟಿಸುವಿಯಾ ಎಂದು ಕೇಳಿದ್ದರು. ಅದಾಗಲೇ ಎಂಎಲ್ ಎ ಚಿತ್ರದಲ್ಲಿ ಜತೆಗೆ ನಟಿಸಿ ಆತ್ಮೀಯತೆ ಇದ್ದ ಕಾರಣ, ತಕ್ಷಣಕ್ಕೆ ಒಪ್ಪಿಕೊಂಡಿದ್ದೆ ಎಂದರು. ಅಂದಹಾಗೆ ಚಿತ್ರದಲ್ಲಿ ಆದ್ಯ ಎನ್ನುವುದು ತಮ್ಮ ಪಾತ್ರದ ಹೆಸರು ಎಂದು ಹೇಳಿದ್ದಾರೆ.
ಅರ್ಜುನ್ ರಾಮ್ ಚಿತ್ರಕ್ಕೆ ಸಂಗೀತ ನೀಡಿದ್ದು, ಈ ಹಿಂದೆ ‘ಹುಲಿರಾಯ’ ಸೇರಿದಂತೆ ಐದಾರು ಚಿತ್ರಗಳಿಗೆ ಸಂಗೀತ ನಿರ್ದೇಶಿಸಿರುವುದಾಗಿ ತಿಳಿಸಿದರು.
ಹಾಡುಗಳನ್ನು ಸಂಚಿತ್ ಹೆಗ್ಡೆ, ಚಂದನ್ ಶೆಟ್ಟಿ ಹಾಡಿದ್ದಾರೆ. ‘ಅವನೇ ಶ್ರೀಮನ್ನಾರಾಯಣ’ ಚಿತ್ರದ ಶೀರ್ಷಿಕೆ ಗೀತೆ ರಚಿಸಿದ ನಾಗಾರ್ಜುನ ಶರ್ಮ ಚಿತ್ರದ ಎರಡು ಹಾಡುಗಳಿಗೆ ಸಾಹಿತ್ಯ ಬರೆದಿದ್ದರೆ, ಒಂದು ಹಾಡನ್ನು ಗೆಳೆಯ ಸುಮೇಶ್ ರಚಿಸಿದ್ದಾರೆ.
ಕೆ.ಜಿ.ಎಫ್ ಖ್ಯಾತಿಯ ವಿಕ್ರಮ್ ಮೋರ್ ಸಾಹಸ ಸಂಯೋಜನೆಯಲ್ಲಿ ಮೂರು ಹೊಡೆದಾಟಗಳಿವೆ. ಮದನ್ ಹರಿಣಿ ನೃತ್ಯ ಸಂಯೋಜನೆ ಇದೆ. ಖಳನಟನಾಗಿ ಕಾಣಿಸಿಕೊಂಡಿರುವ ಚಕ್ರವರ್ತಿ ಚಂದ್ರಚೂಡ್ ತಮಗೂ ನಾಯಕಿಗೂ ಕಾಂಬಿನೇಶನ್ ದೃಶ್ಯಗಳು ಇರದೇ ಹೋಗಿದ್ದು ನಿರಾಸೆ ಮೂಡಿಸಿತೆಂದು ನಕ್ಕರು.
ರೇಖಾ ನಿರ್ಮಾಪಕಿ
ಸ್ಪರ್ಶ ರೇಖಾ ಅವರು ನಾಯಕನ ತಾಯಿಯಾಗಿ ನಟಿಸಿರುವುದರ ಜತೆಗೆ ಚಿತ್ರದ ನಿರ್ಮಾಪಕಿಯಾಗಿರುವುದು ವಿಶೇಷ. “ನಿರ್ದೇಶಕಿಯಾಗಬೇಕು ಎಂದು ಆರಂಭಿಸಿದ ಈ ಚಿತ್ರಕ್ಕೆ ನಾನೇ ನಿರ್ಮಾಪಕಿಯಾದೆ. ಕೊನೆಯಲ್ಲಿ ನಿರ್ದೇಶಕರು ಕೂಡ ಸಹ ನಿರ್ಮಾಪಕರಾಗಿ ಕೈ ಜೋಡಿಸಿದ್ದಾರೆ. ಕಮರ್ಷಿಯಲ್ ಸಿನಿಮಾ ಇದು. ಚಿತ್ರದ ಸ್ಯಾಟಲೈಟ್ ಬಿಸ್ನೆಸ್ ಆಗಿರುವ ಕಾರಣ ಒಂದು ಹಂತಕ್ಕೆ ಸೇಫ್ ಎನ್ನಬಹುದು. ಆದರೆ ಜನ ಕೈ ಹಿಡಿಯುತ್ತಾರೆ ಎನ್ನುವ ನಂಬಿಕೆ ಇದೆ” ಎಂದು ರೇಖಾ ಆಶಾವಾದ ವ್ಯಕ್ತಪಡಿಸಿದರು.
ಚೇತನ್ ಚಿತ್ರವನ್ನು ವಿತರಣೆ ಗೆ ಪಡೆದುಕೊಂಡಿದ್ದು ಚಿತ್ರವು ಫೆಬ್ರವರಿ 14ರಂದು ರಾಜ್ಯಾದ್ಯಂತ ತೆರೆಕಾಣಲಿದೆ.
