ಲವ್ ಮಾಕ್ಟೇಲ್ ಚಿತ್ರದಲ್ಲಿ ಆದಿ(ಕೃಷ್ಣ)ಗೆ ಜೋಡಿಯಾದ ನಿಧಿ(ಮಿಲನಾ ನಾಗರಾಜ್) ಮತ್ತು ದಿಯಾ ಚಿತ್ರದಲ್ಲಿ ದಿಯಾ(ಖುಷಿ)ಗೆ ಜೋಡಿಯಾದ ಆದಿ (ಪೃಥ್ವಿ)ಒಂದಾಗುತ್ತಿದ್ದಾರೆ! ಈ ಸಂಗಮ ಆಗುತ್ತಿರುವುದು ಫಾರ್ ರಿಜಿಸ್ಟ್ರೇಶನ್ ಎನ್ನುವ ಹೊಸ ಚಿತ್ರದಲ್ಲಿ.
ಲಾಕ್ಡೌನ್ ಸಂದರ್ಭದಲ್ಲಿ ಎಲ್ಲರ ಮನ ಸೆಳೆದ ಎರಡು ಚಿತ್ರಗಳಿದ್ದವು. ಅದು ಲವ್ ಮಾಕ್ಟೇಲ್ ಮತ್ತು ದಿಯಾ. ಲವ್ ಮಾಕ್ಟೇಲ್‌ನಲ್ಲಿ ಆದಿಯ ಜೋಡಿಯಾಗಿದ್ದ ನಿಧಿ ಕ್ಯಾನ್ಸರ್‌ನಿಂದ ಸಾಯುತ್ತಾಳೆ. ದಿಯಾದಲ್ಲಿ ದಿಯಾಳ ಪ್ರಿಯಕರ ಆದಿ ಟ್ರೇನ್‌ ಹೊಡೆತಕ್ಕೆ ಸಿಲುಕುತ್ತಾನೆ. ಹಾಗಾಗಿ ಎರಡು ದುರಂತ ಅಂತ್ಯದ ಸಿನಿಮಾಗಳಿಂದ ಪ್ರೇಕ್ಷಕರು ನೊಂದುಕೊಂಡಿದ್ದರು. ಹಾಗಾಗಿ ಲವ್ ಮಾಕ್ಟೇಲ್‌ನ ಆದಿಗೆ ದಿಯಾ ಚಿತ್ರದ ದಿಯಾಳ ಜತೆಗೆ ಮದುವೆ ಮಾಡಿದರೆ ಸರಿ ಹೋದೀತು ಎನ್ನುವ ಜೋಕ್ ಹುಟ್ಟಿತ್ತು. ಆ ಪ್ರಕಾರ ಲವ್ ಮಾಕ್ಟೇಲ್ ನಾಯಕ ಡಾರ್ಲಿಂಗ್ ಕೃಷ್ಣ ಮತ್ತು ದಿಯಾ ಚಿತ್ರದ ನಾಯಕಿ ಖುಷಿ ಒಂದಾಗಿರುವ ಚಿತ್ರ ಬರಬೇಕಿತ್ತು. ಆದರೆ ವಿಪರ್ಯಾಸ ನೋಡಿ; ಎರಡು ಸಿನಿಮಾಗಳಲ್ಲಿ ತೀರಿಹೋದ ಜೋಡಿ ಇದೀಗ ಒಂದಾಗುತ್ತಿದೆ! ಆಗಲೇ ಹೇಳಿದಂತೆ ದಿಯಾದ ನಾಯಕ ಪೃಥ್ವಿ ಅಂಬಾರ್ ಮತ್ತು ಲವ್ ಮಾಕ್ಟೇಲ್ ನಾಯಕಿ ಮಿಲನಾ ನಾಗರಾಜ್ ಅವರನ್ನು ಜೋಡಿಯಾಗಿಸಿ `ಫಾರ್ ರಿಜಿಸ್ಟ್ರೇಶನ್’ ಎನ್ನುವ ಚಿತ್ರ ತಯಾರಾಗಲಿದೆ. ಚಿತ್ರವನ್ನು ನವ ನಿರ್ದೇಶಕ ನವೀನ್ ದ್ವಾರಕನಾಥ್ ನಿರ್ದೇಶಿಸಲಿದ್ದಾರೆ.
ದಿಯಾ ಯಶಸ್ವಿಯಾದ ಬಳಿಕ ಕನ್ನಡ ಬೇಡಿಕೆಯ ಯುವ ನಾಯಕ ನಟರಾಗಿ ಗುರುತಿಸಿಕೊಂಡಿರುವ ಪೃಥ್ವಿ ಅಂಬಾರ್ ಪ್ರಸ್ತುತ ‘ಶುಗರ್ ಲೆಸ್’ ಸಿನಿಮಾದ ಚಿತ್ರೀಕರಣದಲ್ಲಿದ್ದಾರೆ. ಅದರ ಬಳಿಕ `ಲೈಫ್ ಈಸ್ ಬ್ಯೂಟಿಫುಲ್’ ಎನ್ನುವ ಸಿನಿಮಾ ಮುಗಿಸಿಕೊಂಡು ಫಾರ್ ರಜಿಸ್ಟ್ರೇಷನ್‌ ಸಿನಿಮಾದ ಚಿತ್ರೀಕರಣದಲ್ಲಿ ಪಾಲ್ಗೊಳ್ಳಲಿದ್ದಾರೆ.
