ಅಗ್ನಿಶ್ರೀಧರ್ ಚಿತ್ರಕತೆ ಬರೆದಿರುವ ಚಿತ್ರ ‘ಹೆಡ್ ಬುಷ್’ ಸಿನಿಮಾದಲ್ಲಿ ತಾರೆಯರ ದಂಡೇ ಸೇರ್ಪಡೆಯಾಗುತ್ತಿದೆ. ಡಾಲಿ ಧನಂಜಯ್ ಪ್ರಧಾನ ಪಾತ್ರದಲ್ಲಿದ್ದಾರೆಂದು ಘೋಷಿಸಲ್ಪಟ್ಟ ಈ ಚಿತ್ರದಲ್ಲಿ ಇದೀಗ ವಸಿಷ್ಠ ಸಿಂಹ ಮತ್ತು ಶ್ರುತಿಹರಿಹರನ್ ಕೂಡ ಪ್ರವೇಶ ಪಡೆದಿರುವುದು ವಿಶೇಷ.
ಬೆಂಗಳೂರಿನ ಮೊದಲ ಭೂಗತ ಪಾತಕಿಯೆಂದು ಹೆಸರಾದ ಎಂ ಪಿ ಜಯರಾಜ್ ಕುರಿತಾದ ಬಯೋಪಿಕ್ ಇದೆನ್ನುವ ಕಾರಣಕ್ಕೆ ‘ಹೆಡ್ ಬುಷ್’ ಬಗ್ಗೆ ಆರಂಭದಿಂದಲೂ ಕುತೂಹಲ ಸೃಷ್ಟಿಯಾಗಿದೆ. ಚಿತ್ರದಲ್ಲಿ ಜಯರಾಜ್ ಪಾತ್ರ ಮಾಡುವುದರೊಂದಿಗೆ ಡಾಲಿ ಪಿಕ್ಚರ್ಸ್ ಮೂಲಕ ಬಂಡವಾಳವನ್ನೂ ಹೂಡಿದ್ದಾರೆ ಧನಂಜಯ್. ಉಳಿದಂತೆ ‘ಕಪಟ ನಾಟಕ ಸೂತ್ರಧಾರಿ’ ಮತ್ತು ‘ಹುಲಿರಾಯ’ ಸಿನಿಮಾದ ಮೂಲಕ ಗುರುತಿಸಿಕೊಂಡ ಬಾಲು ನಾಗೇಂದ್ರ ಮತ್ತು ಲೂಸ್ ಮಾದ ಯೋಗಿ ಕೂಡ ಈ ಚಿತ್ರದಲ್ಲೊಂದು ಪಾತ್ರ ಮಾಡಿದ್ದಾರೆ. ಇದೀಗ ಹೊಸ ಸೇರ್ಪಡೆಯಾಗಿ ವಸಿಷ್ಠ ಸಿಂಹ ಮತ್ತು ಶ್ರುತಿ ಹರಿಹರನ್ ಜೊತೆಯಾಗಿರುವುದು ವಿಶೇಷ.
ಚಿತ್ರಕ್ಕೆ ಈಗಾಗಲೇ ಪಾಯಲ್ ರಜಪೂತ್ ನಾಯಕಿ ಎಂದು ಹೇಳಲಾಗಿತ್ತು. ಅದರ ನಡುವೆ ಶ್ರುತಿಹರಿಹರನ್ ಆಗಮನ ಕುತೂಹಲ ಮೂಡಿಸಿದೆ. ಒಂದಷ್ಟು ಕಾಲ ಚಿತ್ರರಂಗದಿಂದ ದೂರವಾಗಿದ್ದ ಶ್ರುತಿ ಹರಿಹರನ್ ಈಗ ಪುಟ್ಟ ಮಗುವಿಗೆ ತಾಯಾಗಿದ್ದಾರೆ. ಮಾತ್ರವಲ್ಲ ಅಪರೂಪಕ್ಕೊಂದು ಪಾತ್ರ ಒಪ್ಪಿಕೊಂಡರೂ ಅದರಲ್ಲಿ ಪ್ರಾಧಾನ್ಯತೆ ಹುಡುಕುವವರು ಶ್ರುತಿ. ಹಾಗಿರುವಾಗ ‘ಹೆಡ್ ಬುಷ್’ ಚಿತ್ರದಲ್ಲಿನ ಅವರ ಪಾತ್ರದ ಬಗ್ಗೆ ಕೂಡ ಸಹಜವಾದ ಕುತೂಹಲ ಮೂಡಿದೆ.
