ಎಲ್ಲ ಬಾರಿಯೂ ಶೀರ್ಷಿಕೆಗಳಿಂದಲೇ ಚಮಕ್ ನೀಡುವ ಸಿಂಪಲ್ ಸುನಿ ಈ ಬಾರಿ ‘ಗತವೈಭವ’ದ ಮರುಸೃಷ್ಟಿಗೆ ಮನಸ್ಸು ಮಾಡಿದ್ದಾರೆ. ಟೈಟಲ್ ತುಸು ಗಂಭೀರವಾಗಿ ಕಂಡರೂ, ಹೀರೋ ಲಾಂಚ್ ವಿಡಿಯೋದಲ್ಲಿ ತಮ್ಮ ಎಂದಿನ ಹಾಸ್ಯಶೈಲಿಯನ್ನೇ ಉಳಿಸಿಕೊಂಡಿದ್ದಾರೆ.
ನಾಯಕನಾಗಿ ರಂಗಪ್ರವೇಶ ಮಾಡುತ್ತಿರುವುದು ದುಷ್ಯಂತ. ಪ್ರತಿಭಾವಂತ. ಪ್ರತಿಭೆಯನ್ನು ಕಂಡ ಬಳಿಕ ತನ್ನ ಬತ್ತಳಿಕೆಯಲ್ಲಿರುವ ಒಂದೊಳ್ಳೆಯ ಚಿತ್ರಕತೆಯನ್ನೇ ಸಿನಿಮಾ ಮಾಡಲು ಮುಂದಾಗಿದ್ದಾರೆ ಸುನಿ. ಅದನ್ನು ಈಗಾಗಲೇ ಹೀರೋ ಇಂಟ್ರೊಡಕ್ಷನ್ ವಿಡಿಯೋದಲ್ಲಿ ತಮಾಷೆಯಿಂದ ಹೇಳಿಕೊಂಡಿದ್ದಾರೆ.
ಗತವೈಭವ ಹೆಸರೇ ಸೂಚಿಸುವಂತೆ ಹಿಂದಿನ ಕಾಲದ ಕತೆ. ಪೀರಿಯಾಡಿಕ್ ಆಕ್ಷನ್ ಡ್ರಾಮ ಜಾನರ್ ನಲ್ಲಿ ಒಂದು ಆಕರ್ಷಕ ಕತೆ ಹೇಳಲು ಹೊರಟಿದ್ದಾರೆ ಸುನಿ. ಆದರೆ ಆ ಕತೆ ಏನು ಅನ್ನೋದನ್ನು ಸದ್ಯಕ್ಕೆ ಅವರು ತಿಳಿಸುವ ಮನಸು ಮಾಡಿಲ್ಲ. ಹೀರೋ ಲಾಂಚ್ ಗಾಗಿ ಸೃಷ್ಟಿಮಾಡಿದ ವಿಡಿಯೋ ಗಮನಿಸಿದರೆ ಕೊನೆಯಲ್ಲಿ ಇರುವ ಲುಕ್ ರಾಬಿನ್ ಹುಡ್ ಮಾದರಿಯಲ್ಲಿದೆ. ಅಲ್ಲಿನ ವೈಭವ ಏನು ಅನ್ನೋದನ್ನು ಸಿನಿಮಾ ನೋಡಿಯೇ ಅರಿಯಬೇಕಿದೆ. ಇತ್ತೀಚೆಗೆ ನಾಯಕನ ಜನ್ಮದಿನದ ಪ್ರಯುಕ್ತ ಕೂಡ ಸುನಿ ತಂಡ ಒಂದು ಆಕರ್ಷಕ ವಿಡಿಯೋ ಬಿಡುಗಡೆ ಮಾಡಿತ್ತು.
ಸುನಿ ಸಿನಿಮಾಸ್ ಬ್ಯಾನರ್ ನಲ್ಲಿ ದೀಪಕ್ ತಿಮ್ಮಪ್ಪ ಮತ್ತು ಸಿಂಪಲ್ ಸುನಿ ಚಿತ್ರ ನಿರ್ಮಾಣ ಮಾಡುತ್ತಿದ್ದು, ಭರತ್ ಬಿ ಜೆ ಸಂಗೀತವಿದೆ. ವಿಲಿಯಂ ಡೇವಿಡ್ ಛಾಯಾಗ್ರಹಣ, ಆಶಿಕ್ ಕುಸುಗೊಳ್ಳಿ ಸಂಕಲನ ಇದೆ. ಶಿವಕುಮಾರ್ ಕಲಾ ನಿರ್ದೇಶನ, ಚೇತನ್ ರಂಶಿ ಡಿಸೋಜ ಸಾಹಸ ಸಂಯೋಜನೆ ಇರಲಿದೆ.
