ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅವರ ‘ಫ್ಯಾಂಟಮ್’ ಸಿನಿಮಾ ಚಿತ್ರೀಕರಣ ಶುರುವಾಗಿರುವುದು ಎಲ್ಲರಿಗೂ ಗೊತ್ತು. ಹೈದರಾಬಾದ್‌ನ ಅನ್ನಪೂರ್ಣ ಸ್ಟುಡಿಯೋದಲ್ಲಿ ಸುದೀಪ್ ಅವರ ಚಿತ್ರಕ್ಕಾಗಿ ಹಾಕಲಾಗಿದ್ದ ಕಾಡಿನ ಸೆಟ್ ಅಲ್ಲಿಗೆ ನಿರ್ದೇಕ ಅನೂಪ್ ಭಂಡಾರಿ ಮತ್ತು ಸುದೀಪ್ ಭೇಟಿ ನೀಡಿದ್ದು ಮಾಧ್ಯಮಗಳಲ್ಲಿ ಸುದ್ದಿಯಾಗಿತ್ತು. ಇದೀಗ ಶೂಟ್ ಪುನರಾರಂಭವಾದ ಬಳಿಕ ತೆಗೆಯಲಾದ ಸುದೀಪ್ ನಟನೆಯ ದೃಶ್ಯ ಹೇಗಿತ್ತು ಎನ್ನುವುದನ್ನು ಅರ್ಧ ನಿಮಿಷದ ತುಣುಕು ವಿಡಿಯೋದ ಮೂಲಕ ಹೊರಗೆ ತಂದಿದ್ದಾರೆ ಅನೂಪ್ ಭಂಡಾರಿ.
ದೃಶ್ಯದಲ್ಲಿ ಕುರುಚಲು ಕಾಡುಗಳ ನಡುವಿನ ಕಾಲುವೆಯಲ್ಲಿ ದೋಣಿಯೊಂದರಲ್ಲಿ ನಿಂತು ಪಯಣಿಸುವ ಸುದೀಪ್ ಸನ್ನಿವೇಶದ ಅನಾವರಣವಾಗಿದೆ. ನಿಂತಿರುವ ಸುದೀಪ್, ದೋಣಿಗೆ ಹುಟ್ಟು ಹಾಕುತ್ತಿರುವ ಅಂಬಿಗ ಮತ್ತು ಸುದೀಪ್ ಮಧ್ಯೆ ಪುಟ್ಟ ಬಾಲಕಿ, ಮುಖದಲ್ಲಿನ ಆತಂಕ, ತೀಕ್ಷ್ಣ ಕಣ್ಣುಗಳೊಂದಿಗೆ ನೋಡುವ ನೋಟ ಮತ್ತು ಅದಕ್ಕೆ ಪೂರಕವಾಗಿ ನೀಡಲಾಗಿರುವ ಹಿನ್ನೆಲೆ ಸಂಗೀತ ಎಂಥವರನ್ನು ಕುತೂಹಲದಿಂದ ಚಿತ್ರಕ್ಕಾಗಿ ಕಾಯುವಂತೆ ಮಾಡಿದೆ.
ರಂಗಿತರಂಗ ಎನ್ನುವ ಸುಪರ್ ಹಿಟ್ ಚಿತ್ರವನ್ನು ನೀಡಿದ ಬಳಿಕ ಅದೇ ತಂಡದೊಂದಿಗೆ ಸುದೀಪ್ ಎನ್ನುವ ಸೂಪರ್ ಸ್ಟಾರ್ ಸೇರಿಕೊಂಡಿರುವುದು ಚಿತ್ರದ ಬಗ್ಗೆ ಭರ್ಜರಿ ನಿರೀಕ್ಷೆ ಮೂಡಿಸಿದೆ. ಇಂಥ ನಿರೀಕ್ಷೆಗಳ ನಡುವೆ ಬಂದಿರುವ ಈ ವಿಡಿಯೋ ತುಣುಕು, ಕಿಚ್ಚನ ಅಭಿಮಾನಿಗಳಲ್ಲಿ ಇನ್ನಷ್ಟು ಉತ್ಸಾಹ, ಕಾತರ ಮೂಡಿಸಿರುವುದು ಸುಳ್ಳಲ್ಲ.
