ಇತ್ತೀಚೆಗಷ್ಟೇ ಬಿಡುಗಡೆಯಾಗಿರುವ ಹುಮಾ ಖುರೇಷಿ ಅಭಿನಯದ ಬೇಬಿ ಡು ಡೈ ಡು ಚಿತ್ರದ ಪ್ರಚಾರಕ್ಕಾಗಿ ಬೆಂಗಳೂರಿಗೆ ಬಂದಿದ್ದ ಬಾಲಿವುಡ್ ನಟಿ ಹುಮಾ ಖುರೇಷಿ , ಪ್ರೇಕ್ಷಕರೊಂದಿಗೆ ಸಿನಿಮಾ ನೋಡಿ ಮಾಧ್ಯಮದೊಡನೆ ಮಾತನಾಡಿದ್ದಾರೆ.
ನಮಸ್ಕಾರ ಬೆಂಗಳೂರು… ಅಲ್ಪ ಸ್ವಲ್ಪ ಕನ್ನಡ ಗೊತ್ತು ಎಂದು ಕನ್ನಡದಲ್ಲೇ ಮಾತು ಶುರು ಮಾಡಿದರು ಹುಮಾ ಖರೇಷಿ. ನಮ್ಮ ಸಿನಿಮಾ ‘ಬೇಬಿ ಡು ಡೈ ಡು’ ಪ್ರಮೋಟ್ ಮಾಡಲು ನಾವು ಇಲ್ಲಿಗೆ ಬಂದಿದ್ದೇವೆ. ಇದು ನನ್ನ ಸಹೋದರ ಸಾಕಿಬ್ ಸಲೀಮ್ ಮತ್ತು ನಾನು ಸ್ವತಂತ್ರವಾಗಿ ನಿರ್ಮಿಸಿ, ಬಿಡುಗಡೆ ಮಾಡುತ್ತಿರುವ ಒಂದು ಸಣ್ಣ ಚಿತ್ರ. ಬೆಂಗಳೂರಿನಿಂದ ನಮಗೆ ಸಿಗುತ್ತಿರುವ ಪ್ರೀತಿ ನಮಗೆ ತುಂಬಾ ದೊಡ್ಡದಾಗಿದೆ. ಮೊದಲನೇ ದಿನದಿಂದ ಇಂದಿನವರೆಗೆ ಇಲ್ಲಿ ಚಿತ್ರದ ಶೋಗಳು ಹೆಚ್ಚಾಗುತ್ತಿವೆ. ಚಿತ್ರವನ್ನು ನೋಡಿ ಅಭಿಮಾನಿಗಳು ಇಷ್ಟಪಡುತ್ತಿದ್ದಾರೆ. ನಾವು ತುಂಬಾ ಸಣ್ಣ ಸಿನಿಮಾ ಮಾಡಿರುವುದರಿಂದ ನಿಮ್ಮ ಪ್ರೀತಿ ಮತ್ತು ಜನರ ಬಾಯಿಂದ ಬರುವ ಒಳ್ಳೆಯ ವಿಮರ್ಶೆಗಳೇ ನಮ್ಮ ಚಿತ್ರವನ್ನು ದೊಡ್ಡದಾಗಿಸುತ್ತವೆ .
ಈ ಸಿನಿಮಾದಲ್ಲಿ ನಾನು ಕಿವುಡ ಮತ್ತು ಮೂಗಿಯ ಪಾತ್ರದಲ್ಲಿ ನಟಿಸಿದ್ದೇನೆ, ಇದು ತುಂಬಾ ವಿಭಿನ್ನವಾದ ಚಿತ್ರ. ನನ್ನ ವೃತ್ತಿಜೀವನ ‘ಗ್ಯಾಂಗ್ಸ್ ಆಫ್ ವಸ್ಸೇಪುರ್’ ಚಿತ್ರದಿಂದ ಆರಂಭವಾಯಿತು. ನನ್ನ ಪ್ರೇಕ್ಷಕರು ಮತ್ತು ಅಭಿಮಾನಿಗಳು ನಾನು ಯಾವಾಗಲೂ ಏನಾದರೂ ವಿಭಿನ್ನವಾಗಿ ಮಾಡಬೇಕೆಂದು ನಿರೀಕ್ಷಿಸುತ್ತಾರೆ.
ನಟಿಯಾಗಿ ನಾನು ಯಾವಾಗಲೂ ನನ್ನ ಸಂಭಾಷಣೆಗಳಿಂದ ಹೆಸರಾಗಿದ್ದೇನೆ. ಆದರೆ ಈ ಚಿತ್ರದ ದೊಡ್ಡ ಸವಾಲೆಂದರೆ ನಾನು ಇಡೀ ಸಿನಿಮಾದಲ್ಲಿ ಒಂದೆರಡು ಪದಗಳನ್ನು ಮಾತ್ರ ಮಾತನಾಡುತ್ತೇನೆ. ನನ್ನ ಕಣ್ಣುಗಳು, ಸನ್ನೆ ಭಾಷೆ ಮತ್ತು ಹಾವಭಾವಗಳ ಮೂಲಕವೇ ಪ್ರೇಕ್ಷಕರಿಗೆ ಭಾವನೆಗಳನ್ನು ತಲುಪಿಸಬೇಕಾಗಿತ್ತು.
ಇದಕ್ಕಾಗಿ ನಾನು ಸನ್ನೆ ಭಾಷೆಯ ತಜ್ಞರಿಂದ ತರಬೇತಿ ಪಡೆದೆ ಮತ್ತು ವಿಶೇಷ ಮಕ್ಕಳ ಶಾಲೆಗೆ ಭೇಟಿ ನೀಡಿ ಅವರೊಂದಿಗೆ ಸಮಯ ಕಳೆದಿದ್ದೇನೆ.
ಚಿತ್ರದಲ್ಲಿ ನನ್ನ ಪಾತ್ರದ ಹೆಸರು ಬೇಬಿ ಕರ್ಮರ್ಕರ್. ಈ ಸಿನಿಮಾ ಕೇವಲ ಡಾಕ್ಯುಮೆಂಟರಿ ತರ ಇರಬಾರದು, ಇದೊಂದು ಕಮರ್ಷಿಯಲ್ ಸಿನಿಮಾ ಆಗಿರಬೇಕು ಎಂಬುದು ನಮ್ಮ ಉದ್ದೇಶವಾಗಿತ್ತು. ಆದ್ದರಿಂದ ಎಲ್ಲರಿಗೂ ಸುಲಭವಾಗಿ ಅರ್ಥವಾಗುವಂತಹ ಸಾರ್ವತ್ರಿಕ ಸನ್ನೆ ಭಾಷೆಯನ್ನು ಬಳಸಿದ್ದೇವೆ.
ಗೀತೂ ಮೋಹನ್ ದಾಸ್ ಮತ್ತು ಯಶ್ ಗೆ ತ್ಯಾಂಕ್ಸ್
ಗೀತೂ ಮೋಹನ್ ದಾಸ್ ಮತ್ತು ಯಶ್ ಅವರಿಗೆ ನಾನು ವಿಶೇಷ ಧನ್ಯವಾದಗಳನ್ನು ಹೇಳಲು ಬಯಸುತ್ತೇನೆ. ಇದು ತುಂಬಾ ಸಣ್ಣ ಸಿನಿಮಾವಾಗಿದ್ದರೂ, ಅವರು ನಮ್ಮ ಚಿತ್ರದ ಬಗ್ಗೆ ಉಲ್ಲೇಖಿಸಿ ಸೋಶಿಯಲ್ ಮೀಡಿಯಾದಲ್ಲಿ ಸ್ಟೋರಿ ಹಾಕಿದ್ದರಿಂದ ಬೆಂಗಳೂರಿನಲ್ಲಿ ಚಿತ್ರದ ಬಗ್ಗೆ ದೊಡ್ಡ ಮಟ್ಟದ ಜಾಗೃತಿ ಮೂಡಿದೆ.
ನನಗೆ ಗೊತ್ತು ನಿಮ್ಮೆಲ್ಲರಿಗೂ ಟಾಕ್ಸಿಕ್ ಸಿನಿಮಾ ಬಗ್ಗೆ ತುಂಬಾ ಕುತೂಹಲವಿದೆ ಮತ್ತು ಈ ಪ್ರಶ್ನೆಗಳು ಬರುತ್ತವೆ ಎಂದು ನನಗೆ ತಿಳಿದಿತ್ತು. ಇಡೀ ಜಗತ್ತೇ ಈಗ ‘ಟಾಕ್ಸಿಕ್’ ಬಗ್ಗೆ ಯೋಚಿಸುತ್ತಿದೆ . ಯಶ್ ಅವರು ಈ ದೇಶದ ಅತಿ ದೊಡ್ಡ ಸೂಪರ್ಸ್ಟಾರ್ಗಳಲ್ಲಿ ಒಬ್ಬರು ಮತ್ತು ಅದ್ಭುತ ವ್ಯಕ್ತಿ . ಅವರೊಂದಿಗೆ ಕೆಲಸ ಮಾಡುವುದರಿಂದ ನಾನು ತುಂಬಾ ಕಲಿಯುತ್ತಿದ್ದೇನೆ ಮತ್ತು ಸ್ಫೂರ್ತಿ ಪಡೆಯುತ್ತಿದ್ದೇನೆ . ಸಿನಿಮಾ ಶೀಘ್ರದಲ್ಲೇ ಬರಲಿದೆ, ದಯವಿಟ್ಟು ಸ್ವಲ್ಪ ತಾಳ್ಮೆಯಿಂದಿರಿ. ಕೊನೆಯದಾಗಿ, ಇದು ತುಂಬಾ ಸಣ್ಣ ಸಿನಿಮಾ, ನಿಮಗೆ ಇಷ್ಟವಾದರೆ ದಯವಿಟ್ಟು ಎಲ್ಲರಿಗೂ ತಿಳಿಸಿ ಮತ್ತು ನಿಮ್ಮ ಪ್ರೀತಿಯನ್ನು ನಮ್ಮ ಮೇಲೆ ಹೀಗೆಯೇ ತೋರಿಸಿ. ಧನ್ಯವಾದಗಳು ಬೆಂಗಳೂರು.
